E quixemos festexalo!

Son máis de 20 anos os que Solidariedade Internacional ven tendo presenza na cidade das Burgas, cunha aposta polo Comercio Xusto que, ao principio, materializábase en espazos temporais e eventos puntuais co respaldo dun pequeno grupo de persoas voluntarias.

Pero foi un 22 de novembro de 2004 cando, grazas ao empeño dun grupo de mozos e mozas ben motivados tras participar dunhas “Vacacións Solidarias en Guatemala”, programa estrela daquela na nosa entidade, abrimos a primeira tenda permanente de Comercio Xusto en Ourense e a primeira, tamén, de Solidariedade Internacional de Galicia.

En apenas 13 metros cadrados, no número 8 da Rúa da Paz, e grazas a moitas mans voluntarias, fixemos daquel espazo un referente do consumo responsable na cidade das Burgas.

Dende aquela ata hoxe, e tras dous cambios de localización, a nosa benquerida tenda ten enfrontado un sistema capitalista supremacista, que desbota ao diferente, ao pequeno, e ao público, ocasionado crises económicas o decaemento do pequeno comercio e múltiples pandemias sanitarias e sociais.

Neste tempo participaron activamente da vida desta tendas 42 persoas en calidade de voluntarias ou persoal técnico, vendemos artigos de alimentación e artesanía de Comercio Xusto por valor de mais de medio millón de euros e contribuímos a mellorar as condicións de vida de milleiros de produtores e produtoras en países de América Latina, África e Asia. Máis con todo, estes 20 anos non terían sido posibles sen todos eses consumidores e consumidoras responsables que ano a ano foron conformando o que hoxe é unha clientela fiel e comprometida que nos permite abrir as nosas portas cada dia.

Sen embargo, o compromiso de Solidariedade Internacional de Galicia na cidade de Ourense non se manifesta única e exclusivamente neste espazo físico hoxe situado na rúa Bailén, pois nestas dúas décadas, a nosa organización ten ocupado outros moitos lugares como prazas, rúas, pavillóns e teatros que nos servíron para sensibilizar e concienciar, e sobre todo, servironnos para convidar a toda a cidadanía ourensá a ser parte activa na defensa dos dereitos e da dignidade para todas as vidas.

Deste xeito, fixemos campañas e chamados para denunciar a violencia que sofren as mulleres prostituídas, as persoas indíxenas, os traballadores e traballadoras escravizados, a infancia e demais persoas e colectivos vulnerados. Sumámonos e impulsamos actos de denuncia contra a ocupación dos territorios palestinos e do Sáhara Occidental, causa ambas que hoxe están lonxe de ser resoltas mentres o sufrimento e a morte protagonizan as vidas de quen alí habita.

Neste tempo fixemos moitas tolemias; convocamos noites solidarias nos que chegaron a participar decenas de bares da cidade, apadriñamos galiñas, contamos contos, organizamos concertos, estreamos curtametraxes…
Foron moitas as testemuñas de mulleres e homes que pasaron por esta cidade para contar as súas loitas e activismos en países coma Colombia, Nicaragua, Guatemala, Honduras, El Salvador, Bolivia e centos de ourensáns os que quixeron escoitar os seus relatos.

Hoxe, a tenda de Ourense é un espazo aberto á cidadanía, un espazo de participación social, un lugar a través do cal canalizar o compromiso ca xustiza e a transformación social e do que o actual presidente da entidade di “…aquí dentro hai 800 millóns de persoas repensando as súas relacións no mundo, opoñéndose ao novo capitalismo voraz. Están baixo o paraugas do Comercio Xusto. Entra e cúbrete!”

Por todo isto, o pasado 22 de novembro, celebramos un fermoso encontro que serviu para recordar, compartir e festexar un compromiso que xa dura dúas décadas.

Grazas a todas as persoas que, dun ou doutro xeito, participáchedes deste aniversario.