O pasado mes de abril, 17 persoas entre voluntariado e parte da equipa técnica da nosa organización, emprendemos rumbo a Francia para fortalecer os nosos coñecementos sobre o Comercio Xusto e, especificamente, sobre os procesos do cacao.

Para isto trasladámonos ata Fleurance, unha pequena vila na que se atopa a fábrica de Ethiquable, a única de Europa que garante unha cadea de subministro 100% de Comercio Xusto e sostible de principio a fin, dotando ademais de maior autonomía aos produtores e produtoras de cacao en orixe. Ademais, esta empresa é 100% cooperativa, sendo os seus únicos accionistas os propios traballadores e traballadoras e estando tamén recoñecida como Empresa Solidaria de Utilidade Social.

Da man da cooperativa IDEAS puidemos gozar dunha visita guiada á fábrica a través da cal o noso equipo puido reforzar e aprender máis sobre os procesos que transcorren entre as súas paredes: dende que  que chegan os froitos do cacao ata que saen en forma de tableta e se transportan ás distintas tendas nas que se comercializan. Ademais, cabe salientar que esta non é unha fábrica ao uso, senón que no seu interior tamén se atopa un museo vencellado aos procesos do cacao, poñendo en valor este produto, ás persoas que o cultivan e ás que o procesan para que poidamos gozar dun magnífico chocolate de tan alta calidade nos nosos fogares.

Aproveitamos tamén a visita para coñecer unha das tendas Biocoop, un proxecto cooperativo que aposta pola agricultura ecolóxica sostible e o Comercio Xusto, colocando a ética e a cooperación no centro da súa actividade e desenvolvemento.

A través desta viaxe, ademais de adquirir e reforzar coñecementos respecto ao Comercio Xusto e aos procesos do cacao, tamén se fomentou unha maior cohesión entre o noso voluntariado, fomentando espazos para a reflexión conxunta sobre o aprendido, así coma momentos de lecer nos que fortalecer lazos entre persoal técnico e voluntariado.

Esta visita formou parte do proxecto “O MOVEMENTO SOCIAL DO COMERCIO XUSTO COMO EXERCICIO DE CIDADANÍA GLOBAL: UNHA CONTRIBUCIÓN Á CONSECUCIÓN DA AXENDA 2030 DESDE GALICIA. FASE II” financiado por Cooperación Galega da Xunta de Galicia.