No ano 2022, Solidariedade Internacional de Galicia elaboramos o “ESTUDO SOBRE A PARTICIPACIÓN SOCIAL DAS PERSOAS MAIORES DE 50 ANOS DE GALICIA”. A investigación enmárcase no “Programa de promoción da acción voluntaria das persoas maiores: do envellecemento activo ao envellecemento activista”, que conta co apoio e financiamento da Dirección Xeral de Xuventude, Participación e Voluntariado da Xunta de Galicia a través da convocatoria da asignación do 0,7% do IRPF.

A participación é un elemento chave e indispensable para a transformación social, polo que nos últimos, dende a nosa entidade traballamos arredor desta cuestión, e desenvolvemos procesos participativos extensos tanto cara dentro como cara fóra da institución. É por iso que no seo da nosa organización naceu a inquedanza de desenvolver este estudo.

O estudo foi concibido como un instrumento de reflexión para facilitar o desenvolvemento de iniciativas que promovan a participación deste colectivo dentro do territorio galego. O seu obxectivo foi achegarnos á realidade da participación social, política e cidadá das persoas maiores en Galicia a través dunha investigación diagnóstica de carácter descritivo. Pois a intención foi poder describir o estado da participación das persoas maiores en Galicia: quen participa, en que, como, por que (motivacións /aspectos positivos), por que non (dificultades/ barreiras).

O mesmo contén un marco teórico desglosado en: contextualización da participación, contextualización das persoas maiores en Galicia, o estado da cuestión sobre as persoas maiores e a participación social e, por último, a promoción da participación social das persoas maiores en Galicia. Despois recolle a parte do estudo empírico: metodoloxías, ferramentas de recollida de información, técnicas de análise de datos, etc. No apartado de Resultados pódense consultar as respostas a cada unha das preguntas que compuxeron o cuestionario que se levou a cabo e para o cal contamos cunha mostra de 213 participantes. Por último apórtanse conclusións que resumen os achados da investigación, as referencias e os anexos correspondentes.

Os resultados e conclusións do estudo son moi interesantes, convidan a repensar os xeitos de ser e de facer das organizacións e colectivos, ofrece indicios sobre as inquedanzas, intereses e demandas da xente maior e da algunhas pistas para acadar niveis de participación e implicación máis elevados. Por todo elo, convidámosvos a ler e desfrutar deste documento, sempre aberto, ademais, a calquera suxestión de mellora ou continuidade que nos queirades achegar.

Podes acceder á investigación a través deste enlace.