O pasado 9 de marzo celebramos a nosa Asemblea Anual Ordinaria no Centro Sociocultural de Santa Marta en Santiago de Compostela. Un espazo de encontro para a base social da entidade que ten unha dobre finalidade; dunha banda rendir contas sobre o traballo realizado no xa rematado 2023 e, doutra, plantexar os retos e desafíos do ano en curso e establecer unha folla de ruta que nos permita avanzar cara os nosos fins.

Neste senso, comezou a Asemblea cunha benvida ás persoas asistentes por parte do noso presidente, Rubén Campo Gil, quen aproveitou para poñer en valor o traballo realizado tanto polo equipo técnico como pola nova Xunta Directiva no seu primeiro ano de mandato. Con respecto a este último e a continuación, Maria Caride, vogal, expuso os que foron os obxectivos do equipo de goberno e Miren Blanco, secretaria da entidade, presentou un exhaustivo informe sobre a actividade desenvolvida para acadalos.

Xa para facer balance do acontecido no ano 2023, María Paz, directora, presentou unha vídeo-memoria que percorreu os principais acontecementos dese periodo e que foi acompañado pola visita a unha exposición que, en forma de columnas informativas, expuña a información relevante sobre cada un dos proxectos executados nas áreas de Cooperación Internacional, Educación para a Cidadanía Global e Comercio Xusto. De seguido foron aprobados os informes económicos anuais correspondentes, xa públicos nesta web.

O 2024 quixémolo abordar de maneira colectiva, o que nos levou a desenvolver unha actividade a través da cal todas as persoas asistentes puideron participar activamente da elaboración das propostas que protagonizarán este ano no marco das iniciativas máis salientables da entidade coma O Globo, Activismo Senior, Cine na Rúa, as Tendas de Comercio Xusto ou aquelas que estamos a levar a cabo en Guatemala, Honduras, O Salvador ou Bolivia.

No marco tamén do Plan Anual 2024, Laura Cruz, vogal, presentou unha proposta de melloras laborais que comenzaron a aplicarse dende ese mesmo momento.

E antes de rematar tivemos a oportunidade de coñecer de primeira man a experiencia da xinecologa Minda Gil, do Centro Hospitalario Universitario de A Coruña, recén chegada de Honduras tras participar da segunda brigada médica promovida no país xunto coas nosas socias Solidaridade Galega e Sólida.

O peche da encontro correu a cargo de Lara Blanco, vicepresidenta, quen agradeceu a participación de todas as persoas e convidounos a continuar no camiño do traballo coidado, responsable e profesional co que pretendemos contribuír a xerar cambios positivos na vida das persoas.