O pasado 24 de marzo celebramos en Santiago de Compostela a I Xornada galega sobre protección e defensoría de mulleres defensoras de Dereitos Humanos no Centro de Estudos Avanzados da USC.

Dende Solidariedade Internacional de Galicia e a Coordinadora Galega de ONGD organizamos esta xornada de traballo co obxectivo de artellar un programa pioneiro en Galicia que promova a protección e o acompañamento das mulleres activistas de DDHH que, nos seus países, están a sufrir graves situacións de acoso e risco.

O comezo da xornada veu marcado por dúas intervencións da man de María Martín, representante da Iniciativa Mesoamericana de Mujeres Defensoras de Derechos Humanos, e Haydee Castillo, activista nigaraguana. Con elas puidemos coñecer a violencia que enfrontan as defensoras dos DDHH en América Central, e como a Protección Integral Feminista (PIF) pode facer fronte aos grandes retos que éstas enfrontan.

Tras elas, e da man de Javier Roura, afondamos no traballo de Protectdefenders.eu, mecanismo da Unión Europea para persoas defensoras de Dereitos Humanos.

A continuación, e co fin de contar cunha perspectiva plural e diversa da realidade dos programas de protección no resto do territorio español, interviron as persoas portavoces do Programa Asturiano de Atención a Vítimas da Violencia en Colombia (Javier Arjona), do Programa Vasco de Protección Temporal de Defensoras e Defensores de DDHH (Leire Lasa) e do Programa Valenciano de Protección Integral e Acollida de Defensores e Defensoras de DDHH (Angela Pedraza).

Xa pola tarde, as persoas asistentens participamos de mesas de traballo nas que afondar nun posible futuro programa de protección en Galicia a partir das necesidades e capacidades do sector.

Participaron das xornadas representantes de 13 entidades sociais galegas, a Xunta de Galicia e as tres universidades galegas que, ao final do día, amosaron o seu compromiso de continuar avanzando para o impulso definitivo dun Programa Galego de Protección Integral Feminista a Defensoras de Dereitos Humanos.

“Non pode haber un mundo con xuxtiza social, sin que haxa seguridade para as persoas que defenden os dereitos para todos e todas”.

Esta iniciativa foi posible grazas ao financiamento do Ministerio de Asuntos Exteriores, Unión Europea e Cooperación.