Os programas de protección temporal do estado español, entre os que se atopa Galicia Abriga, reunímonos en Xixón os días 19 e 20 de setembro no Ateneo da Calzada.

A Rede Pro TEJER é unha rede estatal de programas de protección temporal de persoas defensoras dos Dereitos Humanos que xorde da dobre necesidade de, por unha banda, visibilizar a importancia das iniciativas de acollemento temporal e, doutra, dar resposta aos desafíos que enfrontamos para levar adiante o traballo de acompañamento ás persoas acollidas.

Así, o pasado mes de setembro, representantes dos distintos programas atopámonos en Asturias, no encontro anual da rede, que serviu para renovar o compromiso coa protección de persoas ameazadas por defender dereitos, e que nos permitiu establecer mecanismos para unha mellor coordinación.

Neste espazo acordouse que sexa en Galicia onde teña lugar o vindeiro encontro, en setembro de 2025. Pero ata daquela temos un intenso programa de tarefas que inclúe reunións cos ministerios implicados no acollemento temporal, co mecanismo europeo para a recolocación temporal de defensores (Protec Defenders) e coas propias autoridades autonómicas e municipais que están a participar de cada un dos programas.