As compañeiras de Comercio Xusto de Solidariedade Internacional de Galicia convidámoste a visitar as nosas tendas de A Coruña, Ourense e Pontevedra.

Somos Alba e Zaida na tenda de A Coruña, Yasmin na de Pontevedra e  Lara e Alba na de Ourense. Ademáis de nós, as tendas contan coa valiosa participación de cantidade de persoas voluntarias que, dende fai anos e concienciadas co valor do Comercio Xusto, contribúen a abrir cada día as portas destes espazos de construción de xustiza social.

Porque cando cruzas as portas das nosas tendas comeza un cambio no que as túas compras pasan a ter un valor engadido. Cando mercas un produto de Comercio Xusto deixas de ser un consumidor e convírteste nun activista do cambio.

Que podes atopar? 

Traballamos con cooperativas de Comercio Xusto de tódalas partes do mundo, así ofrecemos artesanía de todo tipo, de calidade e orixinal. Cerámica, xogos infantís, bixutería, instrumentos musicáis, cestería e un larguísimo etcétera de cousiñas feitas con mimo. Ademáis tamén podes atopar cosmética natural certificada, libros en galego con temática social e comprometida, xogos cooperativos para os cativos e por suposto alimentación.  Os nosos produtos estrela son o café, o cacao, o té e o azucre, todos eles como ben sabedes son producidos moi lonxe das nosas realidades aínda que sexamos os grandes consumidores deste lado do planeta. Completamos a oferta con galletas, pasta, gominolas, especias… 

Todo isto e máis estaremos encantadas de contarcho se te achegas polas tendas, xa que cada persoa que entra non é para nós un simple cliente, se non alguén con quen compartir os nosos valores e principios.  

E recorda que, se pertences a unha asociación ou colectivo e precisas un lugar para facer as vosas xuntanzas ou actividades, en Ourense e Pontevedra contamos con espazos axeitados que cedemos de maneira gratuita. Consulta aquí.