Continuamos a apoiar o traballo que realiza a asociación guatemalteca MejorHa para favorecer o desenvolvemento integral da Rexión VIII de Jocotán, no departamento de Chiquimula.

El Nanzal, unha das comunidades da rexión, solicitou apoio a MejorHa para mellorar as condicións de habitabilidade da súa comunidade. Viron a necesidade de dar continuidade ao proceso xa iniciado de dotación de cociñas ecolóxicas para as familias e dar cobertura así ao 100% da súa poboación. Tamén, a de atender outra das súas necesidades máis imperiosas, a de garantir a subministración de auga potable tanto a nivel domiciliar como na Escola Oficial Rural Mixta de Educación Primaria.

Actualmente, 28 familias da comunidade, aínda usan para cociñar un sistema rústico de fogón aberto o cociñan no chan. Ningún dos métodos conta cun sistema de cheminea para a canalización do fume ao exterior da vivenda, o que xera numerosas enfermidades oculares e das vías respiratorias. Ademais, estes sistemas teñen outros efectos negativos, como o alto consumo de leña, agravando a deforestación dos bosques da rexión, ou a man de obra familiar que requiren para o corte, recolección e carrexo, tarefa que fundamentalmente recae nas mulleres e nas nenas e nenos.

Doutra banda, a pesar de que a comunidade conta cun sistema de auga, este non é adecuado, xa que en época de verán, cando o caudal diminúe, a metade das familias vense sen subministración. Ademais, o tanque non conta cun sistema potabilizador do auga, polo que o sistema actual contribúe á propagación de enfermidades de orixe hídrica.

Grazas ao financiamento da Deputación da Coruña, construiranse, de maneira participativa y con materiais ecolóxicos, cociñas aforradoras de leña que reducirán a emisión de fume contaminante e facilitarán o proceso de cociñar para estas familias, dotándoas ademais cun kit de cociña. Así mesmo, mellorarase o acceso e calidade da auga para consumo familiar e escolar  e preténdese reforestar e protexer a zona de captación de auga.

A propia comunidade conta con fontaneiros e electricistas comunitarios, que se encargarán do mantemento dos sistemas e así garantir a sostenibilidade do proxecto.