En Solidariedade Internacional de Galicia entendemos a participación coma unha acción colectiva, activa, crítica, responsable e comprometida orientada ao ben común, co fin de mudar dinámicas xeradoras de desigualdade e inxustiza ofrecendo solucións locais a problemas globais. A cultura participativa susténtase en prácticas e en metodoloxías que poden aprenderse e introducirse dentro das organizacións para acrecentar a súa capacidade de resposta diante dos retos aos que se enfronta. A participación é un concepto intimamente ligado á idea de democracia.

Dende esta lóxica, cada ano traballamos con centos de mozos e mozas tratando de que vexan a participación como unha oportunidade. Mediante sesións de traballo e acompañamento, profundizamos con eles e elas na importancia da participación social e deseñamos micro-experiencia de transformación social relacionadas coas súas propias inquedanzas, facendo xa deste proceso un espazo no que experimentar a participación.

Grazas a unha subvención con cargo á asignación tributaria do 0,7 % do imposto sobre a renda das persoas físicas, ao longo deste 2021 traballaremos nesta liña con preto de 100 persoas de diferentes colectivos das catro provincias galegas.

Esta semana, comezamos a facelo da man da entidade Mestura con 12 rapaces e rapazas que demostraron que se de cambiar o mundo se trata, eles e elas tamén teñen moito que dicir e que facer.

Se estás interesad@ en participar desta iniciativa podes contactar con nos en sensibilizacion@solidaridadgalicia.org.